I. PASIUNA NGA PAG-AMPO
Makagarahum nga Amay, ginhatag mo ha amon hi San Lorenzo Ruiz nga usa nga susgaranan hin waray pagruhaduha nga pagtapod ngan diri mababantad nga kadasig samtang naatubang hiya han kamatayon para ipasabot an iya pagtuo. Tagi kami hin sugad nga pagtapod ngan kadasig para magpabilin kami kamatinumanon hit amon pag-atubang hit mga kakurian ngan mga paghugay dida hit amon kinabuhi.
Iginhahalad namon it amon mga pangamaya ngadto han Ginoo pinaagi hit imo pagbulig para dida hit amon mga buhat, mahibaruan ngan mas higugmaon pa namon hi Hesus, an amon Ginoo ngan magtaralwas. Nangangamaya kami hit imo mga panabang, dinhi hini nga novena hin Mapainubsanon nga kasingkasing, para hit paghimaya han Dyos ngan hit pagpasidungog han imo pagdarag-an nga usa nga martyr ni Kristo ngan panalipud han mga Kristyanos.
O madinasigon nga San Lorenzo Ruiz, usa ka nga maupay nga amay hit pamilya, usa ka nga saksi ni Kristo, ngada han kaurhian nga oras han imo kinabuhi dinhi ha kalibutan. Waray ka pagruha-duha hin pagsering nga “bisan kon may-ada mo usakayukot nga kinabuhi, ighahalad mo ngatanan kan Hesus.” Ig’ampo mo kami ha atubangan han trono han Gihahataasi, ngan tagi kami hin kaangayan nga kusog, labi na an mga amay han pamilya, nga magpanguna hit ira tagsa- tagsa nga pamilya hin pag’ampo ug pagdayaw ha Imo. Amen.
II. RESPONSORIO
Mag-uruna:
Damo an nahigugma han ginhadian ni Jesus ha langit, kundi guti la an nagdadara han Iya Kruz. Damo an nagtatalinguha hin kasayunan, kundi guti la an karuyag mag-antos. Damo it karuyag bumulig hit bangkete, kundi guti la an karuyag magpu-asa. Ngatanan naghihingyap magrayhak kaupod an Ginoo, kundi guti la an andam magsakit para ha Iya.
Baton:
Kundi para ha akon, an Kruz gud la han aton Ginoo Jesucristo an akon ipaparayaw; kay pina-agi han Iya kruz, patay an kalibutan para ha akon, ngan patay na ako para han kalibutan. (Gal. 6:14 )
Mag-uruna:
An Kruz pirmi andam ngan naghuhulat ha imo bisan diin. Diri ka makaka-iwas hini bisan diin ka kumadto; kay bisan diin ka kumadto, gindadara mo it imo kalugaringon, ngan pirmi nimo hin’aagi-an it imo kalugaringon. Kulawi ha bawbaw o ha ilarum, ha gawas o ha sag-ud hit imo kalugaringon, ngan bisan diin, imo hikikit-an an Kruz. Ngan bisan diin kinahanglan may-ada mo pag-ilob, kon hingyap mo makarawat an kamurayaw ha imo kaluga-ringon, ngan makakarawat mo an kinabuhi nga waray katapusan.
Baton:
Kundi an para ha akon, an Kruz gud la han aton Ginoo Jesucristo an akon ipaparayaw; kay pina-agi han Iya kruz, patay an kalibutan para ha akon, ngan patay na ako para han kalibutan. ( Gal. 6:14 )
Ngatanan:
Ginoo Jesucristo, pakusga kami hin pagsunod ha Imo, diri la han pagpinit-pinit han tinapay, kundi kaupod na an pag-inom han kales han kakurian. Buligi kami hin paghigugma ha Imo, para ha Imo la ngahaw, ngan diri para hit amon kalugaringon nga panuyo. Buligi kami magin takus pag-antos ha Imo ngaran, Hesus, an ginraysang nga nabanhaw nga Ginoo, ngan manunubos namon, yana ug ha kadayunan. Amen.
III. SYAHAN NGA ADLAW
Makagarahum nga Amay, ginpili Mo hi San Lorenzo Ruiz, mapainubsanon nga sacristan ha Binondo, hin pagdara han Ebanghelyo ha Japan.
Gintawag Mo liwat kami nga magin misyonero, pagpasamwak han maupay nga sumat ngan han kalipay han Imo ginhadian. Palamraga an amon mga hunahuna nga magin matinumanon ngan epektibo kami hit pagpasamwak hini nga misyon syahan, hit amon mga panimalay ngan hit amon igkasi-tawo.
San Lorenzo Ruiz matinumanon ka han imo obligasyon nga usa nga sacristan, pag-tima han adlaw-adlaw nga Misa ngan iba pa nga mga sacramento. Buligi kami nga magin matinumanon hit amon mga buruhaton ha parokya nga kitaon namon ini nga paagi, hin pagpasamwak han maupay nga sumat. Amen.
(Balika an Responsorio)
IV. HIMNO KAN SAN LORENZO RUIZ
i.
An nasud Pilipinhon
Yana in malipayon
Usa nga sugo han langit
Hiya in waray dum-it.
Salamat han Ginoo,
Han Iya mga bendisyon
Pinasamwak han kalibutan
Moreno nga Baraan.
Koro:
Dayawon ka Lorenzo
Ug an iya mga kaupod
Surugu-on ka han Dyos
Buotan ka ug tangkod
Ha Rosaryo han Birhen
Kami in imo kaupod.
Imo an amon kasing-kasing
Lorenzo ka han bungto.
II.
Aton liwat hira iglapid
Mga kaupod nga Martir
Ha tuna ug ha langit
Hira aton dayawon.
Salamat han Ginoo,
Han Iya mga bendisyon
Pinasamwak han kalibutan
Moreno nga Baraan. ( 2X )
IKADUHA NGA ADLAW
Makagarahum nga Amay, gintagan mo hi San Lorenzo hin kaupod nga mga kapadian nga nag-ataman han iya kaupayan. Ginpanalipdan hiya nira, han ginbutang-butangan hiya hin sala han pagpatay ha Binondo, ngan gin-aghat hiya pag-upod ha Japan.
Gin-aampo liwat namon it amon mga kapadian nga matagan hira hin kaangayan nga kusog pag-ataman hit kaupayan han mga tawo nga ira gin’mamangnu-an.
San Lorenzo Ruiz, bendisyoni ngan ig-ampo it amon mga kapadia-an nga magin giya namon hira hit mga buruhaton ha parokya. Magin susgaranan unta hira hit pagtuo ngan paghigugma, lamrag hit amon komunidad ngan kapawa hit paghigugma ha kalibutan. Amen.
(Balika an Responsorio)
IKATULO NGA ADLAW
Makagarahum nga Amay, ginbendisyonan Mo hi San Lorenzo Ruiz hin paghigugma han iya trabaho sugad han iya pagtuman han iya mga responsabilidad kumo usa nga uyamot ngan tangkod nga sacristan. Pinaagi hit amon mga trabaho, mahurma unta it amon mga talento ngan amon mga kakayahan. Pakusga kami nga matuman namon it mga ayat hit amon panginabuhi, ngan makapaghatag kami hin trabaho hit mga waray panginabuhi.
San Lorenzo Ruiz, usa ka liwat nga taga’notaryo, ig’ampo mo kami ha atubangan han trono han Gihahataasi, nga magkamay-ada kami desente nga panginabuhi para makahatag kami hit panginahanglan hit amon pamilya. Amen.
(Balika an Responsorio)
IKAUPAT NGA ADLAW
Makagarahum nga Amay, ginbendisyonan Mo hi San Lorenzo Ruiz hin malipayon nga pamilya nga naghatag ha iya hin suporta, bisan kon ginikan hiya ha Japan para maka-iwas han diri kaangayan nga pag-aresto. Ginpakusog mo an kasing-kasing han iya asawa ug mga anak para ibutang nira an pagtapod ha Imo samtang harayo hi Lorenzo ha ira.
San Lorenzo Ruiz, an imo kinabuhi naipapakita yana, pinaagi han mga Filipino nga mga amay hit pamilya, nga nagpa-pakabuhi ha langyaw nga mga nasud para masuportahan it ira pamilya. An kawara han mga amay han pamilya, nagbubunga hin damo nga mga problema. Ig’ampo mo kami ha trono han Gihahataasi, nga pakusgon an pagtuo han mga iroy ngan mga anak, para mapakusog it ira relasyon hit ira asawa ug amay. Amen.
(Balika an Responsorio)
IKALIMA NGA ADLAW
Makagarahum nga Amay, ginbendisyonan Mo hi San Lorenzo Ruiz hin paghigugma kan Maria, amon Iroy. Binulig hiya hin usa nga grupo nga nagsaad pag-ampo han Santos nga Rosaryo ngan pagpalangbo hini nga debosyon ngadto ha iba. It paghigugma kan Maria magpakusog pa unta hit amon paghigugma ha imo.
San Lorenzo Ruiz, buligi kami pag-higugma kan Maria para pinaagi ha iya, maharani kami kan Hesus. Pasu-a an amon mga kasing-kasing, nga higugmaon namon an Santos nga Rosaryo ngan hin pag-ampo hini kada adlaw, para pirmi kami mahibulig, han makagarahum nga pangamaya han Iroy han Ginoo. An Imo paghigugma kan Maria, makapagpadugang pa unta hit amon debosyon ha iya. Amen.
(Balika an Responsorio)
IKAUNOM NGA ADLAW
Makagarahum nga Amay, ginbendisyonan Mo hi San Lorenzo Ruiz hin mga kaupod nga nakapaghatag hin kusog para bumaya han kalugaringon nasud nga ihalad an ira kinabuhi pagpasamwak han maupay nga sumat ha langyaw nga nasud, ngan bisan ha delikado nga lugar sugad han Japan. An pagpasamwak han maupay nga sumat, amo an kalipayan hini nga mga Dominikano nga kapadian, nga ginbayaan an ira kalugaringon nga nasud, nga waray paghunahuna nga makakabalik pa. Karuyag namon pagsubdon an ira hul-os nga pagsakripisyo han pagpa-samwak han maupay nga sumat.
San Lorenzo Ruiz, gindara nimo ha imo kasing-kasing an maupay nga sumat, binuligan han pagpasubad han mga kaupod nga misyonero, ngan hira an nagtutdo ha imo, nga an pag-ula han kinabuhi para han pagpasamwak han maupay nga sumat amo an gi-uupayi han ngatanan nga mga desisyon han Kristohanon nga kinabuhi. Pakusga an amon paghiguma han misyon ngan pagsuporta han mga Pilipino nga mga misyonero nga aadto ha langyaw nga mga nasud.
(Balika an RESPONSORIO)
IKAPITO NGA ADLAW
Makagarahum nga Amay, ginbendisyonan Mo hi San Lorenzo Ruiz han grasya han pagkamartir, usa ini nga prebilihiyo nga Imo ginhahatag hin pira la nga Imo mga pinili. Bisan kon iton tawag ha amon ngatanan, amo an pag-ukoy han amon pagtu-o ha kada adlaw hit amon kinabuhi, hi kami liwat gin-aaghat nga magin martir para ha Imo, ha ngaran hit paghigugma, pag-ilob para hit iba, labi na an nanginginahanglan. Amay namon hatagi kami han grasya hin pag-ilob.
San Lorenzo Ruiz, an imo pagkamatay para kan Kristo, makapaghatag unta ha amon hin kusog pagserbisyo hit amon igkasi-tawo nga waray ginlala-uman nga kabalyo; pagpasaylo ngan pag-intindi hit iba, nga may pag-ilob ug kalooy, ngan paghigugma han iba nga waray sukol. Pasudlon unta kami han langitnon nga puroy-anan han Amay, sugad han pagkarawat ha imo han iya langitnon nga paghigugma. Amen.
(Balika an RESPONSORIO)
IKAWALO NGA ADLAW
Makagarahum nga Amay, ginbendisyonan Mo hi San Lorenzo Ruiz han grasya han pagkamatinumanon. Ura-ura an iya pag-ilob, ngan an mga pakuri nga iya gin-antos labaw pa han tawhanon nga pag-ilob. Kundi bisan pa hiya dugu-an nga ginpakuri-an dida hin mabaho nga ukad, padayon niya gintug-an an iya pagtuo, ngan nagpamulong nga bisan pa usakayukot it iya kinabuhi, malipayon nga kaburut-on niya ihahalad ha Imo. Hatagi kami hin sugad nga pag-ilob pagdumiri han mga paghugay ha amon kinabuhi.
San Lorenzo Ruiz, pakusga kami nga magpabilin kami kama-ilob hit amon pakipagbisog hit sala ngan panulay. Tagi kami han grasya pagdumiri han mga tawag han kalibutanon nga kalipayan ngan masayon nga kinabuhi.
(Balika an RESPONSORIO)
IKASIYAM NGA ADLAW
Makagarahum nga Amay, ginbendisyonan Mo hi San Lorenzo Ruiz, hin mga kaupod nga mga martir nga nag-aghat, nagpakusog, ngan nag-ampo han ira mga kaupod ngada han pagpataya ha ira. Namatay hira nga nagkakanta han mga salmo ha Imo ngaran, puno hin paglaum, nga makaupod Ka han ginhadi-an nga ginsaad ha ngatanan nga magtinu-ohon. An kinabuhi ha kadayunan an nagpuno han ira mga kasing-kasing, samtang ira gin-iilob an makalilisang nga mga pagpakuri.
San Lorenzo Ruiz, updi kami hini nga amon paglalakaton dinhi hini nga kalibutan nga luhaan, nga it amon kauhaw hit kinabuhi nga dayon, mag-angkon ha amon, ngan pinaagi ha imo, ini nga amon hingyap hin kinabuhi nga dayon, mapakusog pa, para diri na makaulang it mga pagpakuri ha amon para kan Hesus. Paluraba ha amon it mas halarum pa nga paghigugma ha langit, ngan an hingyap nga makadangat kami hini nga puruy-anan. Amen.
(Balika an RESPONSORIO)