DOWNLOAD | eLEKSYONARYO - SEMANA SANTA

PAGBASA I

Is 52:13—53:12

Pagbasa tikang han Basahan ni Isaias, an Manaragna.

Nagsiring an Ginoo, “Magmamainuswagon an akon surugoon dida han iya buruhaton; ngan pagpapasidunggan gud hiya. Nahadlok in damo nga mga tawo han pakakita nira ha iya; maraot hin duro an iya hitsura nga haros diri na hiya tawo pagkit-on. Kundi yana mahipapausa ha iya in damo nga kanasoran, ngan diri makakayakan in kahadian tungod han ira paghipausa. Makita ngan masasayod hira han butang nga waray pa gud nira hibaroi.”

Mabaton an mga tawo, “Hin-o man an matuo han amon yana iginsumat? Kan kanay man ipakita an kamot han Ginoo? Kaburot-on adto han Ginoo nga an iya surugoon tumubo sugad hin tanom nga ginmamot dida hin mamara nga tuna. Waray niya kaligdong o katahom nga makakaaghat ha aton hin pagtan-aw ha iya. Waray gud pagkatahom dida ha iya waray gud ano man nga makakakabig ha aton ngada ha iya. Gintamay ngan ginsalikway ta hiya; gin-ilob niya an pag-antos ug kasakitan. Waray gud ngani natan-aw ha iya—ginpabay-an ta hiya ngan ginpakawaray ta la hiya. “Kundi gin-ilob niya an pag-antos nga aton unta arantoson, an kasakitan nga kita unta an magdadara. An aton hunahuna nga an iya pag-antos usa nga kastigo nga iginpadara han Dyos. Kundi ginsamad hiya tungod han aton mga sala, ginhampak hiya tungod han karat-an nga aton ginbuhat. Natambal kita pinaagi han kastigo nga iya gin-antos, nag-upay kita pinaagi han mga hampak nga iya kinarawat. Sugad kita ngatanan hin mga karnero nga nagkawawara, an kada usa ha aton napakadto han iya kalugaringon nga aragian. Kundi kinarawat han Ginoo an kastigo, an kastigo nga angay ha aton ngatanan. “Ginpakurian gud hiya, kundi gin-ilob la ini niya nga mapinaubsanon; waray gud hiya magyakan. Sugad hin nati nga karnero nga pag-iihawon na,

sugad hin karnero nga pag-aarotan na, waray gud hiya magyakan. Gindakop, ginhukman, ngan gindara hiya basi patayon, ngan waray gud may nabaraka hiunong han iya dadangatan. Ginpatay hiya tungod han mga sala han aton mga tawo. Iginbutang hiya didto hin usa nga lubnganan, tampo han mga magraot, iginlubong hiya tampo han mga riko, bisan kon waray gud hiya magtalapas o waray gud magbuwa.” Nagsiring an Ginoo, “Akon kaburot-on adto nga mag-antos hiya; usa nga paghalad an iya kamatayon nga magdadara hin pasaylo. Sanglit makita hiya han iya mga tulin; mag-uokoy hiya hin hilawig nga kinabuhi, ngan pinaagi ha iya matutuman an akon kaburot-on. Katapos hin kinabuhi nga tugob hin pag-antos, magmamalipayon na liwat hiya; hibabaroan niya nga waray makawang an iya pag-antos. An akon hinigugma nga surugoon nga akon nalilipayan, amo an magdadara han kastigo para hin amo nga mga tawo, ngan tungod ha iya akon hira pasasayloon. Sanglit tatagan ko hiya hin dapit nga dungganan, usa nga dapit nga tampo han dagko ngan gamhanan nga mga tawo.

Kinasingkasing an pagtubyan niya han iya kinabuhi, ngan nakaangkit hiya han dinangatan han magraot nga mga tawo. An iya pag-antos iginliwan han damo nga mga sala, ngan nag-ampo hiya basi pasayloon unta hira.”

An Pulong han Ginoo.

SALMO RESPONSORIO          

Sal 31: 2 & 6,12-13,15-16,17 & 25

(b) Amay ko, ha imo mga kamot itinutubyan ko an akon kinabuhi.

1. Nadangop ako ha imo, Ginoo, hin pagpanalipod;

ayaw gud itugot nga pagdag-on ako.

Dyos ka nga matadong,

talwasa ako, ako nag-aampo!

Ha imo kamot itinutubyan ko an akon espiritu.

Tatalwason mo ako, Ginoo;

matinumanon ka nga Dyos. (b)

2 An ngatanan ko nga kaaway ngan mga kaamyaw,

nagyuyubit ha akon;

adton akon mga kakilala nahahadlok ha akon;

kon hinkikit-an nira ako ha kalsada nalikay hira.

Hinkalimtan ako han ngatanan,

daw sugad hin patay na ako;

sugad nala ako hin ipirilak nga butang. (b)

3. Kundi an akon pagsarig aada ha imo, O Ginoo;

ikaw an akon Dyos.

Dayuday ginmamangnoan mo ako;

talwasa ako han akon mga kaaway,

hadton mga nagtitimaraot ha akon. (b)

4. Kalooyi an imo surugoon;

talwasa ako ha imo dayuday nga paghigugma.

Magmakusog ngan magmaisog

kamo ngatanan nga malaomon ha Ginoo. (b)

PAGBASA II          

Heb 4:14-16; 5:7-9

Pagbasa tikang han Surat ngadto han mga Hebreo.

Mga kabugtoan: Sanglit kapti naton hin maupay an aton pagtoo, kay hi Jesus nga Anak han Dyos, an aton gilalabawi nga padi, aadto na ha atubangan han Dyos. Napaid han aton kamaluya ini nga aton gilalabawi nga padi, kay ginsulay liwat hiya ha ngatanan nga paagi, sugad ha aton, kundi waray hiya makasala. Sanglit pagmadasigon ngan dangop kita han trono han Dyos, diin aadto an grasya basi karawaton naton an kaluoy ngan hiagian naton an grasya nga makakabulig ha panahon han aton pagkinahanglan.

Han nakanhi pa hiya ha tuna, nag-ampo ngan nangamuyo hi Jesus upod in makusog nga mga pagtangis ngan mga luha ngadto sa Dyos nga makakatalwas ha iya tikang han kamatayon. Tungod kay mapinaubsanon ngan buotan man hiya pinamatian hiya han Dyos. Kundi bisan kon Anak hiya han Dyos nahibaro hiya hin kamasinugtanon pinaagi han iya mga pag-antos. Han kahingpit na niya, nahimo hiya nga burabod han dayon nga katalwasan para hadton ngatanan nga masinugtanon ha iya.

An Pulong han Ginoo.

PAGBASA III

Jn 18:1 - 19:42

An Pasyon han aton Ginoo Jesucristo sumala Juan.

Parag-asoy: Katapos ni Jesus mag-ampo hini, linakat hiya upod an iya mga tinun-an ngan tinabok han sapa nga Kidron an ngaran. May tanaman didto hadto nga dapit, ngan sinulod ngadto hi Jesus ngan an iya mga tinun-an. Agsob hi Jesus makig-urosa han iya mga tinun-an didto, sanglit maaram hini nga dapit an malingo nga Judas. Sanglit kinadto hi Judas hini nga tanaman upod in mga sondalo ngan mga gwardya han Templo nga ginsugo han mga puno han kapadian ngan mga Parisiyo. Dara nira in mga hinganiban, mga parol, ngan mga sulo. Maaram hi Jesus han ngatanan nga mahinanabo ha iya, sanglit gintapo niya ngan ginpakianhan hira,

Jesus: “Hin-o an iyo ginbibiling?”

Parag-asoy: Nagbaton hira,

Katawhan: “Hi Jesus nga taga-Nazaret.”

Parag-asoy: Nagsiring hiya,

Jesus: “Amo ako.”

Parag-asoy: Natindog didto upod ha ira an malingo nga Judas. Han pagsiring la ni Jesus, “Amo ako,” inisol hira ngan nagkatutumba ha tuna. Ginpakianhan na liwat hira ni Jesus,

Jesus: “Hin-o gud an iyo ginbibiling?”

Parag-asoy: Nagbaton hira,

Katawhan: “Hi Jesus nga taga-Nazaret.”

Parag-asoy: Nagsiring hi Jesus,

Jesus: “Ginsumatan ko na kamo nga amo ako, sanglit kon ako an iyo tuyo, palakta niyo inin iba.”

Parag-asoy: Ginsiring niya ini basi matuman an iya iginyakan, “Amay, waray ako kawad-i bisan usa han imo iginhatag ha akon.” May espada hi Simon Pedro; hinulbot ini niya ngan tigbason an oripon han Labaw nga Padi, ngan napalong an tuo nga talinga han oripon. Malco an ngaran han oripon. Nagsiring hi Jesus kan Pedro,

Jesus: “Ibalik ha takob an imo espada! Naghuhunahuna ka ba nga diri ko iimnon an kupa hin pag-antos nga iginhatag ha akon han akon Amay?”

Parag-asoy: Gindakop ngan gingapos hi Jesus han mga sondalo nga upod han ira kapitan, ngan han mga gwardya nga Judiyo. Gindara hiya nira, syahan ngadto kan Anas nga ugangan ni Caifas nga amo an Labaw nga Padi hadto nga tuig. Hi Caifas an nagsagdon han mga Judiyo nga maoruopay pa nga usa la nga tawo an mamatay para han ngatanan nga katawhan.

Sinunod kan Jesus hi Simon Pedro ngan hin usa nga tinun-an. Kilala kaupay han Labaw nga Padi adto nga usa nga tinun-an, sanglit binunyog hiya kan Jesus ngadto ha bungsaran han balay han Labaw nga Padi. Nagpabilin hi Pedro ha gawas, ha may portahan. Ginawas an tinun-an nga kilala han Labaw nga Padi, nakighimangraw han daragita nga nakada han portahan ngan ginpasulod hi Pedro. Nagpakiana kan Pedro ini nga daragita nga bantay han portahan,

Tawo: “Diri ka ba usa han mga tinun-an hito nga tawo?”

Parag-asoy: Nagbaton hi Pedro,

Tawo: “Diri.”

Parag-asoy: Tungod han kahagkot nagtap-ong an mga surugoon ngan mga gwardya nga nagkatukdaw hira palibot han tap-ong nga nagdadangdang ha ira ngahaw. Tinig-ob hi Pedro ha ira basi kapasuan hiya.

Nagpakiana kan Jesus an Labaw nga Padi mahitungod han iya mga tinun-an ngan mahitungod han iya pagturon-an. Nagbaton hi Jesus,

Jesus: “Dayuday dayag an akon pagyakan ha ngatanan. Ginbuhat ko an ngatanan nga pagtutdo didto ha mga sinagoga ngan ha Templo, diin napakadto didto an ngatanan nga mga Judiyo. Waray gud ako magyakan hin bisan ano nga diri dayag ha iyo. Kay ano nga ako an iyo ginpapakianhan? Asay niyo pakianhi an mga tawo nga nagpakabati ha akon. Pakianhi hira kon ano an akon iginsumat ha ira, sayod hira han akon iginyakan.”

Parag-asoy: Han pagsiring hini ni Jesus, gintampalo hiya hin usa han mga gwardya nga nakadto ngan sidngon,

Tawo: “Kamailob mo hin pagyakan hin sugad ngadto han Labaw nga Padi!”

Parag-asoy: Nagbaton ha iya hi Jesus,

Jesus: “Kon may iginyakan ko nga sayop, sumati an ngatanan nga hahani kon ano an akon ginyakan. Kundi kon matadong man an akon ginyakan, kay ano nga gintampalo mo ako?”

Parag-asoy: Ngan iginpadara ni Anas hi Jesus nga ginapos pa, ngadto kan Caifas, an Labaw nga Padi. Han natindog pa hi Pedro nga nagdadangdang harani han tap-ong, nagpakiana ha iya an iba,

Tawo: “Diri ka ba usa han mga tinun-an hito nga tawo?”

Parag-asoy: Naglirong hiya ngan nagsiring,

Tawo: “Diri!”

Parag-asoy: Sinagbang hin pagpakiana in usa han mga oripon han Labaw nga Padi, nga urupod han ginpalongan ni Pedro,

Tawo: “Diri ba ikaw an hinkit-an ko nga kaupod niya didto han tanaman?”

Parag-asoy: Ngan nagsiring na liwat hi Pedro,

Tawo: “Diri.”

Parag-asoy: Ngan hito ngahaw nga takna tinugaok in manok. Han agaaga pa, gindara nira hi Jesus tikang han balay ni Caifas ngadto han palasyo han gobernador. Waray sumulod han palasyo an mga Judiyo kay diri nira karuyag magtalapas han balaod han ira tuluohan hiunong han paglinis, basi makakaon hira han panihapon han Paglabay. Sanglit ginawas na la hi Pilato ngadto ha ira ngan nagpakiana,

Tawo: “Ano in iyo sumbong kontra hini nga tawo?”

Parag-asoy: Nagbaton hira,

Katawhan: “Diri unta namon hiya gindadara nganhi ha imo kon waray pa hiya makagtalapas.”

Parag-asoy: Nagsiring hi Pilato ha ira,

Tawo: “Dad-a hiya ngan usisaha niyo sumala han iyo kalugaringon nga balaod.”

Parag-asoy: Nagbaton an mga Judiyo,

Katawhan: “Diri itinutugot ha amon hin pagpatay bisan kan kanay.”

Parag-asoy: Nahinabo ini basi matuman an iginyakan ni Jesus han paghimangraw niya kon ano nga paagi mamamatay hiya. Sinulod liwat ha palasyo hi Pilato ngan gintawag hi Jesus. Nagpakiana hiya kan Jesus,

Tawo: “Ikaw ba an hadi han mga  Judiyo?”

Parag-asoy: Nagbaton hi Jesus,

Jesus: “Kalugaringon mo ba ini nga pakiana, o ginsumatan ka ba hin iba mahitungod ha akon?”

Parag-asoy: Nagbaton hi Pilato,

Tawo: “Kay ano, Judiyo ba ako? An imo kalugaringon nga mga tawo ngan an ira mga puno han kapadian an nagtubyan ha imo nganhi ha akon. Ano ba in nabuhat mo?”

Parag-asoy: Nagsiring hi Jesus,

Jesus: “Diri kanan hini nga kalibutan an akon ginhadian. Kon kanan kalibutan pa an akon ginhadian, nakikig-away unta an akon mga sakop basi diri ako mahulog ha kamot han mga Judiyo. Diri, diri kanan hini nga kalibutan an akon ginhadian!”

Parag-asoy: Sanglit nagpakiana ha iya hi Pilato,

Tawo: “Kon sugad, hadi ka ngay-an?”

Parag-asoy: Nagbaton hi Jesus,

Jesus: “Ikaw an nasiring nga hadi ako. Tungod hini, natawo ngan kinanhi ako ha kalibutan, basi magpamatuod han kamatuoran. Namamati ha akon an bisan hin-o nga aada han kamatuoran.”

Parag-asoy: Nagpakiana hi Pilato,

Tawo: “Ano ba an kamatuoran?”

Parag-asoy: Binalik ngadto ha gawas hi Pilato ngan nagsiring ngadto han mga Judiyo,

Tawo: “Waray ko hin-agian nga sadang pasikaran hin pagsirot ha iya. Kundi sumala han iyo batasan, nagpapagawas ako hin usa nga priso para ha iyo ha panahon hin Paglabay. Karuyag ba niyo nga buhian ko para ha iyo an hadi han mga Judiyo?”

Parag-asoy: Ginoliat hira pagbaton ha iya,

Katawhan: “Diri, ayaw hiya! Karuyag namon hi Barabas?”

Parag-asoy: Tikasan ini hi Barabas. Ngan ipinakuha ni Pilato hi Jesus ngan iginpalatob hiya ha ira. Naghimo an mga sondalo hin korona tikang hin tunokon nga mga sanga ngan iginsul-ot ha iya ulo. Ginbadoan hiya nira hin panapton nga pula, gindaop hiya, ngan ginsiring,

Katawhan: “Mabuhi an Hadi han mga Judiyo!”

Parag-asoy: Ngan gintampalo hiya nira. Ginawas na liwat hi Pilato ngan sidngon an mga tawo,

Tawo: “Tan-awa, dadad-on ko hiya nganhi ha iyo basi niyo hibaroan nga waray ko hin-agian nga sadang pasikaran hin pagsirot ha iya.”

Parag-asoy: Ngan ginawas hi Jesus nga nakakasul-ot han tunokon nga korona ngan han panapton nga pula. Nagsiring hi Pilato ngadto han mga tawo,

Tawo: “Kitaa, iini an tawo!”

Parag-asoy: Han pakakita la ha iya han mga puno han kapadian ngan mga gwardya, naggoliat hira,

Katawhan: “Igraysang hiya ha kros! Igraysang hiya ha kros!”

Parag-asoy: Nagsiring hi Pilato ha ira,

Tawo: “Kuhaa hiya niyo ngan igraysang hiya ha kros. Waray ko hin-agian nga sadang pasikaran hin pagsirot ha iya.”

Parag-asoy: Nagbaton an mga Judiyo,

Katawhan: “May-ada kami balaod nga nagsusumat nga kinahanglan hiya mamatay, kay nagpaka-Anak han Dyos hiya.”

Parag-asoy: Labi na nga nahadlok hi Pilato han pakabati niya hini. Binalik hiya pagsulod ngadto han palasyo ngan nagpakiana kan Jesus,

Tawo: “Tikang ka ba diin?”

Parag-asoy: Kundi waray magbaton hi Jesus. Nagsiring ha iya hi Pilato,

Tawo: “Diri ka ba nabaton ha akon? Tigamni nga may-ada ko gahom hin pagtalwas ha imo ngan hin pagraysang ha imo ha kros.”

Parag-asoy: Nagbaton hi Jesus,

Jesus: “May-ada ka gahom ha akon tungod la nga iginhatag ini han Dyos ha imo; sanglit darudako nga salaan an nagtubyan ha akon ngada ha imo.”

Parag-asoy: Han pakabati hini ni Pilato, nagtalingoha hiya pagbiling hin paagi hin pagbuhi kan Jesus. Kundi naggoliat an mga Judiyo,

Katawhan: “Kon buhian mo hiya, diri ka ngay-an sangkay han Emperador! Kaaway han Emperador an bisan hin-o nga napakahadi!”

Parag-asoy: Han pakabati ni Pilato hini nga mga pulong, iginawas niya hi Jesus, ngan liningkod ha lingkoran han maghurukom dida han dapit han ginngangaranan “An Plataporma nga bato.” “Gabata” an ngaran hini ha Hebreo. Tikaurudto na adto han bisperas han Paglabay. Nagsiring hi Pilato ngadto han mga Judiyo,

Tawo: “Iini an iyo hadi!”

Parag-asoy: Naggoliat hira,

Katawhan: “Pataya hiya! Pataya hiya! Igraysang hiya ha kros!”

Parag-asoy: Nagpakiana hi Pilato ha ira,

Tawo: “Karuyag ba niyo nga igraysang ko ha kros an iyo hadi?”

Parag-asoy: Nagbaton an mga puno han kapadian,

Katawhan: “An Emperador la an amon hadi!”

Parag-asoy: Sanglit igintubyan ha ira ni Pilato hi Jesus, basi igraysang ha kros. Sanglit gindara nira hi Jesus. Ginuwa hiya nga nagpapas-an han iya kros, ngan inabot ha dapit nga gintatawag “An Dapit han Klabera.” “Golgota” an tawag hini ha Hebreo. Didto iginraysang nira ha kros hi Jesus. Iginraysang liwat nira ha mga kros in duha pa ka tawo ha magkasi ligid niya, nga nabubutnga nira hi Jesus. Iginsurat ni Pilato in usa nga pahibaro ngan iginpataod ini ha kros. Amo ini an ginsurat: “Hi Jesus nga taga-Nazaret, an Hadi han mga Judiyo.” Nakabasa hini in damo nga mga Judiyo kay diri man hirayo tikang han syudad an dapit nga ginraysangan kan Jesus. Iginsurat an pahibaro ha pinulongan nga Hebreo, Latin, ngan Griego. Nagsiring kan Pilato an mga puno han kapadian han mga Judiyo,

Katawhan: “Ayaw isurat ‘An Hadi han mga Judiyo,’ kundi ‘Nagsiring ini nga tawo, Ako an Hadi han mga Judiyo.’”

Parag-asoy: Nagbaton hi Pilato,

Tawo: “An nahisurat, nahisurat na.”

Parag-asoy: Katapos pagraysangan kan Jesus han mga sondalo, ginkuha nira an iya mga panapton ngan ginbahinbahin hin upat ka bahin, usa ka bahin ha kada sondalo. Ginkuha liwat nira an iya halawig nga panapton nga hinimo hin usa la nga dugnit nga hinablon, ngan waray tinahian. May hinsiring han mga sondalo,

Katawhan: “Ayaw ta paggisia ini; kundi pagripa kita kon hin-o in makakadara.”

Parag-asoy: Nahinabo ini basi matuman an kasuratan nga nasiring: “Ginbahinbahin nira an akon mga panapton, ngan ginripahan an akon hilawig nga bado.” Sanglit ginbuhat ini han mga sondalo. Natukdaw hirani han kros ni Jesus hira iya nanay, an bugto nga babaye ni iya nanay, hi Maria nga asawa ni Cleopas, ngan hi Maria Magdalena. Hinkit-an ni Jesus hi iya nanay ngan an tinun-an nga iya hinigugma nga natukdaw harani han kros; sanglit nagsiring hiya kan iya nanay,

Jesus: “Babaye, iini an imo anak.”

Parag-asoy: Ngan nagsiring hiya ngadto han tinun-an,

Jesus: “Iini an imo nanay.”

Parag-asoy: Ngan tikang hadto gindara hiya han tinun-an hin pag-ukoy tampo han iya panimalay. Maaram hi Jesus nga natuman na an ngatanan, ngan basi matuman an kasuratan, nagsiring hiya,

Jesus: “Inuuhaw ako.”

Parag-asoy: May surudlan didto nga puno hin maaslom nga bino. Ginhumog nira an espongha hin bino, igintaod ha kataposan hin sanga hin isopo, ngan iginhungit ha iya. Dinimdim hi Jesus han bino ngan nagsiring hiya,

Jesus: “Natuman na!”

Parag-asoy: Ngan dinuko hiya ngan nabunoson hiya han iya kinabuhi.

Alayon kita pagkaluhod. (Mamalandong hin madaliay an ngatanan.) Alayon kita pagkatukdaw.

Ngan naghangyo kan Pilato an mga Judiyo nga barion na la an mga bitiis han mga tawo nga iginraysang, ngan tanggalon na hira ha kros. Ginbuhat ini nira, kay Viernes na adto ngan nadiri hira nga magpabilin ha kros an lawas ha Adlaw nga Iparahuway, kay baraan kaupay an tiarabot nga Adlaw nga Iparahuway. Sanglit kinadto an mga sondalo ngan ginbari an mga bitiis han syahan nga tawo ngan han usa pa nga tawo nga iginraysang upod kan Jesus. Kundi han pag-abot na nira kan Jesus, hinkit-an nira nga patay na hiya, sanglit waray na la nira baria an iya mga bitiis. Kundi ginbangkaw an iya kagiliran hin usa han mga sondalo, ngan inmawas dayon in dugo ug tubig. Nagpamatuod mahitungod hini an nakakita hini nga hinabo, basi tumoo man kamo. Matuod an iya iginsiring, ngan maaram hiya nga naghihimangraw hiya han kamatuoran. Ginbuhat ini basi matuman an kasuratan nga nasiring, “Waray usa han iya mga tul-an nga mababari.” Ngan may-ada lain pa nga bahin han kasuratan nga nasiring, “Makita an mga tawo ngadto hadton ginbangkaw nira.”

Katapos hini, ginhangyo hi Pilato ni Jose nga taga-Arimatea, nga tugotan hiya pagkuha han lawas ni Jesus. Tinun-an ni Jesus ini hi Jose, kundi hilom la, kay nahadlok hiya han mga punoan nga Judiyo. Gintugotan hiya ni Pilato, sanglit kinmadto hi Jose ngan gintanggal niya an lawas ni Jesus. Binunyog ha iya hi Nicodemo, an tawo nga nakigkita kan Jesus ha usa ka gab-i. May dara hiya nga mga kwarenta ka kilo nga pahamot nga sinakot nga mira ug aloe. Ginkuha nira nga duha an lawas ni Jesus ngan ginputos hin lino nga mga dugnit upod han mga pahamot sumala han batasan hin paglubong han mga Judiyo. May-ada tanaman didto han dapit nga ginraysangan kan Jesus, ngan nakada in bag-o nga lubnganan nga waray pa paglubngi. Tungod kay bisperas na adto han Adlaw nga Iparahuway, ngan hirani manla an lubnganan, didto na la nira iglubong hi Jesus.

An Ebanghelyo han Ginoo.