DOWNLOAD | eLEKSYONARYO - SEMANA SANTA

AN PAGSULOD HAN GINOO NGADTO HA JERUSALEM

EBANGHELYO

Lk 19:28-40

+Pagbasa tikang han santos nga ebanghelyo sumala kan Lucas

Nagpadayon hi Jesus ngadto ha Jerusalen, ngan nag-una hiya han iya mga tinun-an. Han pag-abot niya hirani ha Betfage ug Betania, ha bukid han mga Olibo, ginpauna niya in duha nga mga tinun-an, upod ini nga mga tugon: “Kadto kamo ha baryo nga natatadong niyo; pagsulod niyo, makikita niyo in ihinigot nga nati nga asno nga waray pa kasakyi. Hubara ito ngan dad-a nganhi. Kon may magpaki-ana ha iyo, ‘Kay ano nga iyo man iton ginhuhubaran?’ sidnga hiya, ‘Ginkikinahanglan ini han Agaron.’”

Nagkalakat hira ngan nakita nira sugad gud han iginsisiring ni Jesus ha ira. Han ginhuhubad na nira an nati nga asno, nagpaki-ana ha ira an mga tag-iya, “Kay ano nga iyo man ito ginhuhubaran?”

Nagbaton hira, “Ginkikinahanglan ini han Agaron,” ngan gintugwayan nira an nati ngadto kan Jesus. Niyan, iginhapin nira an ira mga kirugpos ha bungkog han hayop, ngan ginbuligan nira hi Jesus hin pagsakay.  Han pagtipaunhan niya, pinanmitad nira ha dalan an ira mga kurugpos.

Han pag-abot nira hirani ha Jerusalem, ha dapit nga tipalugson an dalan ha bukid han mga Olibo, nagtikang an kadam-an han iya mga tinun-an hin pagpasalamat ngan pagdayaw han Dyos hin dagko nga inga tingog, tungod han ngatanan nga dagko nga mga butang nga ira hinkit-an: “Dayawon han Dvos an hadi nga makanhi ha ngaran han Ginoo! Kalinaw ha langit, himaya sa Dyos ha kahitas-an!”

Niyan nagsiring kan Jesus in pira nga mga Parisiyo tikang dida han kadam-an nga tawo. “Magturutdo, sawaya an imo mga tinun-an nga diri hira mag-inaringasa.” Nagbaton hi Jesus, “Susumatan ko kamo: kon mahilom ngani hira. an mga bato ngahaw an manggogoliat.”

An Ebanghelyo han Ginoo.

AN MISA

PAGBASA I

Is 50:4-7

Pagbasa tikang han basahan ni Isaias, an Manaragna.

Gintutdoan ako han Ginoo nga Dyos kon ano an akon igsisiring, basi makahatag ako hin kusog hadton mga ginugul-an. Kada aga gin-aaghat ako niya hin pamati han iya igtututdo ha akon. Gintagan ako han Ginoo hin pagsabot, ngan waray ako sumupil o bumaya ha iya. Ginlubasan ko an akon taludtod ngadto hadton mga naghahampak ha akon, tinugotan ko hira hin pagtamay ha akon, han pagrabot han akon bungot, ngan pagtupra ha akon bayhon. Kundi diri makakadaot ha akon an ira mga pagtamay, kay ginbubuligan ako han Ginoo nga Dyos. Maniniguro ako nga mailob ko ini, maaram ako nga diri ako kaalohan.

An Pulong han Ginoo.

SALMO RESPONSORTO         

Sal 22:8-9, 17-18a, 19-20, 23-24

(b) Dios ko, Dios ko, kay ano nga ginbayaan mo ako?

1. Gintataw-an ako han ngatanan nga nakita ha akon;

nanyayam-id hira ngan naglilingolingo.

“Tinapod ka han Ginoo,” nasiring hira.

“Kay ano nga diri ka tinatalwas niya?

Kon kinaruruyag ka han Ginoo,

kay ano nga diri ka niya binubuligan?” (b)

2. Ginlilibotan ako hin hugpo nga mga yawan-on;

ginduduok ako nira pareho hin kaayaman;

ginkakagat nira an akon mga kamot ngan mga tiil.

Nakikita an ngatanan ko nga mga tul-an. (b)

3. Ginriripahan nira an akon mga panapton

ngan hira la ngahaw an nagbahinbahin.

O Ginoo, ayaw ako pagbayai!

Kadi dayon pagtalwas ha akon! (b)

4. Susumatan ko an akon mga tawo han imo nabuhat,

pagdadayawon ko ikaw ha ira katirok:

“Pagdayawa hiya, kamo nga mga surugoon han Ginoo!

Pasidunggi hiya, kamo nga mga tulin ni Jacob!

Pagsingbaha hiya, kamo nga mga tawo han Israel! (b)

PAGBASA II

Fil 2.6-11

Pagbasa tikang han surat ni San Pablo han mga taga Filipos.

Dayuday may-ada niya kinaiya han Dyos, kundi waray hiya makahuna-huna hin pagtupong han Dyos pinaagi hin kusog. Lugod, ha iya kaburot-on, itinubyan niya an ngatanan nga pagka-Dyos, ngan kinmuha hiya han kinaiya hin surugoon. Natawo hiya sugad ha aton, ngan pinmakita hiya nga sugad hin tawo. Nagpaubos hiya ngan nagsugot tubtob ha kamatayon—an kamatayon ha kros. Tungod hini, gin-undong hiya han Dyos ngadto han gihahataasi nga langit, ngan ihinatag ha iya an ngaran nga labaw han iba nga mga ngaran. Ha pagpasidungog han ngaran ni Jesus, maluhod an ngatanan nga aadto ha langit an aanhi ha tuna, ngan aadto ha kahiladman, ngan ha dayag magpapasangyaw nga hi Jesu-Cristo amo an Ginoo, ha pagpasidungog han Dyos nga Amay.

An Pulong han Ginoo.

PAGBASA III

Lc 22:14—23:56

 An Pasyon han aton Ginoo Jesucristo sumala kan Lucas.

Parag-asoy: Han pag-abot na han takna, liningkod hi Jesus ha iya dapit ha lamesa upod han mga apostoles. Nagsiring hiya ha ira,

Jesus: “Karuyag ko gud hin pakigsaro ha iyo hini nga Paglabay nga panihapon ugsa ako mag-antos! Kay susumatan ko kamo: diri na ako makaon hini tubtob nga matuman an kahulogan hini didto han Ginhadian han Dyos.”

Parag-asoy: Ngan ginkuha ni Jesus an kupa, nagpasalamat sa Dyos, ngan nagsiring,

Jesus: “Kuhaa niyo ini ngan pagbahinbahina ha iyo ngahaw, kay susumatan ko kamo nga diri na ako mainom hini nga bino tikang yana tubtob han pag-abot han Ginhadian han Dyos.”

Parag-asoy: Ngan ginkuha niya an tinapay, nagpasalamat sa Dyos, ginpinitpinit ini, ngan iginhatag ha ira nga nagsiring,

Jesus: “Amo ini an akon lawas nga ihinahatag ha iyo. Buhata ini niyo nga hinumdoman ha akon.”

Parag-asoy: Ha sugad man nga paagi, iginhatag niya ha ira an kupa katapos han panihapon nga nagsiring,

Jesus: “Amo ini nga kupa an bag-o nga ginsaaran han Dyos, nga gintigamnan han akon dugo nga gin-ula para ha iyo. Kundi kitaa! Aanhi kaupod ko ha lamesa an naglilingo ha akon! Kay mapatay an Anak han Tawo sumala han pagbuot han Dyos; kundi kairo hito nga tawo nga maglilingo ha akon!”

Parag-asoy: Ngan nagtikang hira hin paggiparupakiana kon hin-o ha ira an magbubuhat hini.

Nagtikang dida han mga tinun-an in lantugi kon hin-o ha ira an angay kilalahon nga gilalabawi. Nagsiring hi Jesus ha ira,

Jesus: “May gahom an mga hadi hini nga kalibutan hin pagbuot han ira mga sakop, ngan ginngangaranan an mga pangulo nga ‘Mga Sangkay han mga tawo.’ Kundi diri amo ini nga paagi ha iyo; lugod an gilalabawi ha iyo kinahanglan masugad han gimamanghuri, ngan an pangulo kinahanglan masugad han surugoon. Hin-o an larulabaw, an nalingkod ba hin pagkaon o an nagsisirbe ha iya? Ada, an nalingkod. Kundi kaupod ako niyo sugad hin usa nga nagsisirbe. Nagpabilin kamo upod ha akon ha ngatanan ko nga mga pag-antos; ngan sugad nga gintagan ako han akon Amay han katungod hin paghadi, tatagan ko man kamo han amo ngahaw nga katungod. Makaon ngan mainom kamo ha akon lamesa didto han akon Ginhadian, ngan malingkod kamo ha mga trono hin paghukom han dose nga mga tribo han Israel.

“Simon, Simon! Pamati! Gintugotan hi Satanas hin pagsulay ha iyo ngatanan, sugad han paglaina hin mag-uroma han trigo ngan han uhot. Kundi nag-ampo ako para ha imo, Simon, nga diri mapakyas an imo pagtoo. Ngan kon mahibalik ka na ha akon, kinahanglan padig-onon mo an imo kabugtoan.”

Parag-asoy: Nagbaton hi Pedro,

Tawo: “Ginoo, andam ako hin pag-upod ha imo ha bilanggoan, ngan hin pagpakamatay pa upod ha imo!”

Parag-asoy: Nagbaton hi Jesus,

Jesus: “Susumatan ko ikaw, Pedro, diri matugaok an manok yana nga gab-i tubtob nga magsiring ka hin makatulo nga diri ka nakilala ha akon.”

Parag-asoy: Ngan nagsiring hi Jesus ha ira,

Jesus: “Han pagsugoa ko ha iyo hadto nga waray pitaka, supot nga surudlan hin limos, o sandalyas, nagkulang ba kamo hin bisan ano?”

Parag-asoy: Nagbaton hira,

Jesus: “Waray,”

Parag-asoy: Nagsiring hi Jesus,

Jesus: “Kundi kon hin-o ha iyo nga may-ada supot o surudlan hin limos kinahanglan nga dad-on niyo yana; ngan an waray espada, kinahanglan magbaligya han iya bado ngan pumalit hin usa. Kay susumatan ko kamo hini: kinahanglan matuman an Kasuratan nga nasiring mahitungod ha akon, ‘Igintampo hiya han mga kriminal.’ Kay natutuman na an nahisurat mahitungod ha akon.”

Parag-asoy: Nagsiring an mga tinun-an,

Katawhan: “Kitaa, Ginoo! Iini in duha nga espada.”

Parag-asoy: Nagbaton hiya,

Jesus: “Igo na ito!”

Parag-asoy: Ginawas hi Jesus han syudad, ngan sugad han iya nahiaraan, kinadto hiya ha Bukid han mga Olibo; ngan inupod ha iya an iya mga tinun-an. Han pag-abot niya didto, nagsiring hiya ha ira,

Jesus: “Pag-ampo nga diri kamo masulay.”

Parag-asoy: Ngan inuruonhan hiya ha ira hin kahirayo nga kanan usa ka labay hin bato, ngan linuhod ngan nag-ampo,

Jesus: “Amay ko, kon imo pagbuot, kuhaa gad ini nga kupa ha akon. Diri an akon, kundi an imo pagbuot an matuman.”

Parag-asoy: Pinakita ha iya in usa nga anghel tikang ha langit, nga nagpakusog ha iya. Ha dako gud nga kasakit nag-ampo hiya hin huruhugot pa nga pangamuyo, an iya balhas sugad na hin mga turo hin dugo nga natabigis ha tuna.

Han pagbangon niya tikang ha pag-ampo, binalik hiya ngadto han iya mga tinun-an, ngan iya hira hin-agian nga nangangaturog na, nga rutay na tungod han ira kabidoon. Ngan nagsiring hiya ha ira,

Jesus: “Kay ano nga nangangaturog kamo? Pagmata kamo ngan pag-ampo nga diri kamo masulay.”

Parag-asoy: Nagyayakan pa hi Jesus han pag-abot hin mga tawo. Nag-uuna ha ira hi Judas nga usa han dose nga mga tinun-an, ngan dinaop hiya kan Jesus hin pagharok ha iya. Kundi nagsiring hi Jesus,

Jesus: “Judas, lilingoon mo ba an Anak han Tawo pinaagi hin harok?”

Parag-asoy: Pakasabot han mga tinun-an nga kaupod ni Jesus han mahinanabo, nagsiring hira,

Katawhan: “Ginoo, gagamiton na ba namon an amon mga espada?”

Parag-asoy: Ngan gintigbas han usa ha ira an oripon han Labaw nga Padi, ngan napalong an iya tuo nga talinga. Kundi nagsiring hi Jesus,

Jesus: “Igo na ini!”

Parag-asoy: Ginkamkam niya an talinga han tawo, ngan gin-upay niya.

Niyan ginsiring ni Jesus an mga puno han kapadian, an mga opisyal han gwardya han Templo, ngan an katigurangan nga kinmadto pagdakop ha iya,

Jesus: “Kinanhi ba kamo hin pagdakop ha akon nga daw sugad hin tikasan, nga may mga espada ngan mga balbag man kamo? Kaupod man ako niyo adlaw-adlaw ha Templo, ngan waray kamo magtalinguha hin pagdakop ha akon. Kundi amo na ini an iyo takna, nga diin naghahadi na an gahom han kasisidman.”

Parag-asoy: Gindakop nira hi Jesus, ngan gindara hiya ngadto han balay han Labaw nga Padi; ngan inantaw la hi Pedro hin pagsunod ha iya. May ginharing nga tap-ong ha butnga han bungsaran, ngan tinampo hi Pedro han mga nagkakalingkod palibot han kalayo. Han paghikit-i ha iya han usa han mga surugoon nga kababayen-an nga tinampo hiya hin paglingkod, tinutokan hiya niya ngan sidngon,

Tawo: “Kaupod liwat niya ini nga tawo!”

Parag-asoy: Kundi naglirong hi Pedro hin pagsiring,

Tawo: “Babaye, diri ngani ako nakilala ha iya!”

Parag-asoy: Waray pag-iha hinkit-an hi Pedro hin usa ka tawo ngan ginsiring,

Tawo: “Kausa ka liwat nira!”

Parag-asoy: Kundi nagbaton hi Pedro,

Tawo: “Sangkay, diri ako kausa nira!”

Parag-asoy: Ngan naglabay hin mga usa ka oras, ug may lain nga tawo nga nangusog hin pagsiring,

Tawo: “Waray ruhaduha upod gud ini nga tawo ha iya, kay taga-Galilea liwat hiya!”

Parag-asoy: Kundi nagbaton hi Pedro,

Tawo: “Sangkay, diri ako maaram han imo ginyayakan!”

Parag-asoy: Samtang nagyayakan pa hiya, tinugaok dayon in usa nga manok. Liningi an Ginoo ngan tinutok kan Pedro, ngan nahinumdom hi Pedro han mga pulong han Ginoo, han iya pagsiring, “Diri pa matugaok an manok yana nga gab-i, masiring ka na hin makatulo nga diri ka nakilala ha akon.” Ginawas hi Pedro ngan nagtangis nga duro an kabido.

Ginyubitan ngan gintubal hi Jesus han mga tawo nga nagbabantay ha iya. Gintahoban nira an iya mga mata, ngan ginpakianhan,

Katawhan: “Tigoha! Hin-o an nagsuntok ha imo?”

Parag-asoy: Ngan damo la nga mga pagyubit an ira ginyakan ha iya.

Pagkaadlaw na, nagtirok an katigurangan han mga Judiyo, an mga puno han kapadian, ngan an mga magturutdo han Balaod, ngan gindara hi Jesus ngadto han ira Labaw nga Hukmanan. Nagsiring hira,

Katawhan: “Sumati kami, amo ka ba an Mesiyas?”

Parag-asoy: Nagbaton hiya,

Jesus: “Diri kamo matuod ha akon kon pagsumatan ko kamo, ngan diri kamo mabaton kon magpakiana ako ha iyo. Kundi yana, malingkod na an Anak han Tawo ha tuo han Dyos nga Labi Kamakagarahum.”

Parag-asoy: Nagsiring hira ngatanan,

Katawhan: “Kon sugad amo ka ba an Anak han Dyos?”

Parag-asoy: Nagbaton hiya ha ira,

Jesus:  “Kamo an nasiring nga Anak ako han Dyos.”

Parag-asoy: Ngan nagsiring hira,

Katawhan: “Waray na kita kinahanglan hin mga saksi! Nakabati na kita ngahaw han iya gud kalugaringon nga mga pulong!”

________________

Dinhi nagtitikang an halipot nga pagbasa

Lc 23:1-49

Parag-asoy: Binuhat an bug-os nga hugpo ngan gindara hi Jesus ngadto kan Pilato, diin nagtikang hira hin pagsumbong ha iya,

Katawhan: “Hindakpan namon ini nga tawo nga naglilimbong han amon mga tawo. Ginsiring hira nga diri hira magbayad hin mga buhis ngadto han Emperador, ngan nagtug-an hiya nga amo hiya an Cristo nga usa nga hadi.”

Parag-asoy: Nagpakiana ha iya hi Pilato,

Tawo: “Amo ka ba an hadi han mga Judiyo?”

Parag-asoy: Nagbaton hi Jesus,

Jesus: “Ikaw an nagyakan hito,”

Parag-asoy: Niyan ginsiring ni Pilato an mga puno han kapadian ngan an mga tawo,

Tawo: “Waray ako hin-aagian nga pangatadongan hin pagsirot hini nga tawo.”

Parag-asoy: Kundi nagpirit gud hira hin pagsiring,

Katawhan: “Pinaagi han iya pagtutdo hiya an tinikangan han kasamokan han mga tawo ha bug-os nga Judea. Inuna hiya ha Galilea, nga yana aanhi na hiya.”

Parag-asoy: Pakabati ni Pilato hini, nagpakiana hiya,

Tawo: “Taga-Galilea ba ini nga tawo?”

Parag-asoy: Paghibaro niya nga tikang hi Jesus ha dapit nga ginhahadian ni Herodes, iginpadara niya hiya ngadto kan Herodes, nga nakadto liwat ha Jerusalem hadto nga panahon. Nalipay gud hi Herodes han pakakita niya kan Jesus, kay damo na an iya hinbatian hiunong ha iya, ngan maiha na nga karuyag gud hiya kumita kan Jesus. Naglalaom hiya hin pagkita kan Jesus nga magbuhat hin milagro. Sanglit damo an iya pakiana kan Jesus, kundi waray magbaton hi Jesus bisan usa ka pulong. Dinaop ha atubangan an mga puno han kapadian ngan an mga magturutdo han Balaod, ngan nagpasaka hin makusog nga mga sumbong kontra kan Jesus. Ginyubitan hi Jesus ni Herodes ngan han iya mga sondalo, ngan ginpakaalohan hiya nira. Ginbistehan hiya nira hin kanan hadi panapton, ngan iginbalik ngadto kan Pilato. Hadto manta nga adlaw nagkasangkay hira Herodes ug Pilato; magkontra hira hadto anay han waray pa ini mahinabo.

Gintirok ni Pilato an mga puno han kapadian, an mga pangulo, ngan an mga tawo, ngan ginsiring hira, “Gindara niyo ini nga tawo nganhi ha akon, ngan nagsiring kamo nga ginlilipatlipat niya an mga tawo. Yana, gin-usisa ka na hiya ha iyo atubangan, ngan waray ko hin-agian nga sala bisan usa han mga sumbong nga iyo iginpasaka kontra ha iya. Waray gihapon makaagi hin sala ha iya bisan ngani hi Herodes, kay iginbalik man hiya ha aton. Waray ginbuhat hini nga tawo nga angay sirotan han kamatayon. Sanglit ipalalatob ko nala hiya ngan pabubuhian.”

Ha kada Pyesta han Paglabay nababatasan ni Pilato in pagbuhi hin usa nga priso nga karuyag han mga tawo. Naggoliat an bug-os nga hugpo,

Katawhan: “Pataya hiya! Buhii hi Barabas para ha amon!”

Parag-asoy: Napriso hi Barabas tungod hin karibok nga nahinabo ha syudad, ngan tungod hin pagpatay. Karuyag ni Pilato nga buhian hi Jesus, sanglit gintawag liwat niya an mga tawo. Kundi naggogliat hira,

Katawhan: “Igraysang hiya ha kros! Igraysang ha kros!”

Parag-asoy: Nagsiring ha ira hi Pilato hin ikatulo na,

Tawo: “Kundi ano nga sala an iya nabuhat? Waray ko hin-agian nga ano man nga iya nabuhat nga angay sirotan hin kamatayon! Ipalalatob ko nala hiya ngan pabubuhian.”

Parag-asoy: Kundi dinuroy lugod hira hin pagtikadako han ira gogliat nga kinahanglan igraysang hi Jesus ha kros; ngan ha kataposan tinugotan hira ni Pilato. Sanglit iginpahamtang ni Pilato kan Jesus an sirot nga ira ginpangaro. Ginbuhian ni Pilato an tawo nga ira kinaruyag, an napriso tungod hin pagribok ngan pakamatay, ngan igintubyan hi Jesus ha ira, basi buhaton nira an ira karuyag.

Igin-gawas nira hi Jesus. Han paglakat na nira, iginkatapo nira in usa ka tawo nga Simon an ngaran, nga taga-Cirene, nga tisulod ha syudad tikang ha huron. Gindakop hiya nira, iginpapas-an ha iya an kros, ngan iginpadara ha iya ha luyo ni Jesus. Nagsunod ha iya in kadam-an nga mga tawo, ngan upod ha ira in pira nga kababayen-an nga nagtitinangis ngan nagngunguugoy tungod ha iya. Liningi hi Jesus ha ira ngan nagsiring,

Jesus: “Kababayen-an han Jerusalem! Ayaw kamo pagtangis tungod ha akon, kundi pagtangis lugod kamo tungod ha iyo ngahaw ngan tungod han iyo mga anak. Kay maabot an mga adlaw, nga masiring an mga tawo, ‘Kapalaran han kababayen-an nga mga baw-as, nga waray mga anak, nga waray magpasuso!’ Amo ito an panahon nga masiring ha kabukiran an mga tawo, ‘Tabuni kami!’ ngan ha kapungtoran, ‘Tagoa kami!’ Kay kon pagbuhaton in sugad nga mga butang kon hilaw pa an kahoy, ano in mahinanabo kon uga na ito?”

Parag-asoy: Nagdara liwat hira hin duha nga mga kriminal, nga papatayon nira upod kan Jesus. Han pag-abot nira ha dapit nga gintatawag “An Klabera,” didto iginraysang nira ha kros hi Jesus, ngan an duha nga mga kriminal, an usa ha iya tuo, ngan an usa ha iya wala. Nagsiring hi Jesus,

Jesus: “Amay ko, pasayloa hira! Kay diri hira maaram han ira ginbubuhat.”

Parag-asoy: Ginbahinbahin nira an iya mga panapton pinaagi hin ripa. Natindog didto an mga tawo nagkikinita, samtang nagbibiaybiay ha iya an mga pangulo nga Judiyo:

Katawhan: “Nagtalwas hiya han iba; papagtalwasa hiya han iya kalugaringon, kon tinuod nga amo hiya an Mesiyas nga ginpili han Dyos!”

Parag-asoy: Ginyubitan liwat hiya han mga sondalo. Kinadto hira ha iya hin paghatag ha iya hin maaslom nga bino, ngan nagsiring,

Katawhan: “Talwasa an imo kalugaringon, kon tinuod manggud nga ikaw amo an hadi han mga Judiyo!”

Parag-asoy: Iginsurat ini nga mga pulong ha igbaw niya: “Amo ini an Hadi han mga Judiyo.” Ginyubitan liwat hiya han usa han mga kriminal nga nabitay didto,

Tawo: “Diri ka ba amo an Mesiyas? Talwasa an imo kalugaringon ngan talwasa kami!”

Parag-asoy: Kundi ginsaway hiya han usa nga kriminal,

Tawo: “Diri ka ba nahadlok han Dyos? Aanhi kita ginsirotan hin sugad nga sirot nga ihinatag ha iya. Matadong ini nga sirot para ha aton, kay nakarawat kita han angay nga sirot han aton ginbuhat; kundi waray hiya ginbuhat nga maraot.”

Parag-asoy: Ngan nagsiring hiya kan Jesus,

Jesus: “Jesus, hinumdomi gad ako kon makanhi ka na nga hadi.”

Parag-asoy: Nagbaton hi Jesus ha iya,

Jesus: “Susumatan ko ikaw: yana ngahaw nga adlaw, maupod ka ha akon ngadto ha Paraiso.”

Parag-asoy: May mga alas dose an takna nga waray na pagsirak an adlaw, ngan nalukop hin kasirom an bug-os nga tuna tubtob ha alas tres han kulop; ngan napikas an biray han Templo. Ginoliat hi Jesus hin makusog nga tingog,

Jesus: “Amay ko! Ha imo mga kamot itinutubyan ko an akon espiritu!”

Parag-asoy: Katapos pagyakan niya hini, nabunosan hiya han iya kinabuhi.

Alayon pagkaluhod. (Mamalandong hin madaliay.) Alayon pagkatukdaw.

Parag-asoy: Hinkit-an han kapitan han mga sondalo an nahinabo, ngan gindayaw niya an Dyos, hin pasiring,

Tawo: “Matuod gud nga maupay hiya nga tawo!”

Parag-asoy: An mga tawo nga nagtirok hin pagtan-aw hini nga kiritaon, kinita han nahinabo. Nanguli hira nga nagpupukpok han ira mga dughan tungod han ira kabidoan. Natindog ha antaw hin pagkita hini nga mga butang an ngatanan nga kakilala ni Jesus upod an kababayen-an nga nagsunod ha iya tikang pa ha Galilea. Inantaw la hira hin pagtindog basi makakita hira tikang ha hirayo.

________________

Dinhi natatapos an halipot nga pagbasa.

Parag-asoy: May usa ka tawo nga Jose an ngaran, nga tikang ha Arimatea nga bungto han mga Judiyo. Maupay ngan dungganan hiya nga tawo, ngan nagpapaabot hiya han Ginhadian han Dyos. Bisan kon kaapi hiya han Labaw nga Hukmanan, waray hiya umuyon han ira larang ug buhat. Kinadto hiya kan Pilato ngan gin-aro niya an lawas ni Jesus. Ngan gintanggal an lawas, ginputos hin dugnit nga lino ngan ibinutang ha lubnganan nga inukab ha bato—usa nga lubnganan nga waray pa gud gamita. Adlaw adto ha pag-andam ngan bisperas na han Adlaw nga Iparahuway. Binunyog kan Jose an kababayen-an nga nagsinunod kan Jesus tikang pa ha Galilea, ngan nakakita han lubnganan, ngan kon gin-unan-o hin pagbutang han lawas ni Jesus didto. Niyan nanguli hira ngan nag-andam hin mga pahamot ngan mga idirihog han iya lawas.

Pinahuway hira ha Adlaw nga Iparahuway sumala han sugo han Balaod.

An Ebanghelyo han Ginoo.